Kálfur og pasta

Pönnusteikt kálfakjöt á pappardellebeði

Uppskrift fyrir tvo:

2 sneiðar kálfasnitsel (eða svínasnitsel), fitusnyrtar og skornar í strimla
200 gr. papardelle pasta frá DeCecco
1/2 krukka SACLÁ sveppa og marsala sósa
50 ml. marsala vín
2 msk. matarrjómi eða sýrður rjómi
1 msk. ósaltað smjör
1 lárviðarlauf
Sjávarsalt og nýmalaður pipar

 

Bræðið smjörið á stórri pönnu og bætið lárviðarlaufinu út í. Saltið og piprið hveitið og veltið kjötinu upp úr því. Leggið kjötið á pönnuna og steikið á hvorri hlið í fjórar mínútur. Hellið þá marsala víninu út á og sjóðið í eina
til tvær mínútur. Takið kjötið af pönnunni og haldið því heitu. Bætið Saclá
sveppa- og marsala sósu á pönnuna, svo og rjómanum. Komið upp suðu og setjið
þá kjötið aftur út í. Sjóðið þar til kjötið er heitt í gegn. Komið upp suðunni á söltuðu vatni í stórum potti. Sjóðið pastað þar til það er "al dente" skv. leiðbeiningum. Sigtið og setjið á heita matardiska. Raðið kjötinu ofan á pastað og ausið sósunni yfir. Berið fram með muldum pipar úr kvörn.

Athugasemdir

[Steinunn Þórisdóttir, 28.2.2008 kl. 09:51]

Hljómar vel, en það er ekki hægt að fá kálfakjöt í öllum búðum. Hvar þá helst? Kálfakjöt er nefnilega æðislegt með pasta. Smakkaði það á Ítalíu fyrst.

[Hrönn Sigurðardóttir, 28.2.2008 kl. 17:21]

Ummm þessa ætla ég að prófa! Hvað heldurðu með að skipta út kálfa- eða svínasnitsel fyrir kjúklingabringur? Hefurðu prófað það?

[Guðjón H Finnbogason, 28.2.2008 kl. 22:41]

Ég hef ekki prufað það en það á að vera alveg hægt maður á að prufa því maður eyðileggur ekkert.Ég hef notað mikið saman kjúkling og pasta,skrúfur, fiðrildi og hólka og það er bara gott.