Mexikó

Lykilhráefnin í mexíkóskum mat eru chillipipar, grænn pipar, vorlaukur og hvítlaukur. Án þessara krydda telst maturinn varla ósvikinn, en þó er ekki nauðsynlegt að nota öll kryddin í einu. Mexíkósk matargerð er þekkt fyrir sitt sterka kryddbragð, raunar má segja að það sé algengt þar sem um heitt loftslag er að ræða. Tilgangurinn með sterku kryddbragði er tvenns konar: það hefur örvandi áhrif á matarlyst í heitu lofslagi og virkar einnig sem rotvarnarefni. Mexíkóskur matur er þó ekki endilega bragðsterkur eða "heitur", en þeir sem eru hrifnir af slíku ættu að finnast chillipipar og cayennepipar tilvaldir.

Mexíkóskur matur er mjög fjölbreyttur og eru til margar útfærslur af því hvernig hægt er að búa til girnilega rétti úr einföldu hráefni. Kjúklingabringur, nautahakk og nautastrimlar henta sérstaklega vel til mexíkóskrar matargerðar. Einnig bragðast ýmist sjávarfang vel með mexíkósku kryddi, þó sérstaklega rækjur. Undirstaðan er oftast tortilla, fyllt með kjötmeti sem er kryddað með mexíkóskri blöndu, t.d. fajita kryddi og taco kryddi, og borið fram með ýmsu grænmeti, taco eða salsa sósu, sýrðum rjóma ofl. Í raun má segja að allt sé leyfilegt þegar kemur að mexíkóskri matargerð.