Steiktur saltfiskur á bökuðum kartöfluskífum

 

Fyrir 4

800g vel útvatnaður saltfiskur, roð og beinlaus í 100g bitum.
hveiti
smjör og olía
4-6 bökunarkartöflur, eftir stærð
½ laukur, saxaður
2 hvítlauksgeirar, fínt saxaðir
3 dl grænmetissoð (eða vatn og teningar)
1 dl rjómi
3 tómatar
salt og pipar

Kartöflur
Afhýðið kartöflurnar og skerið í ½ cm þykkar sneiðar. Steikið sneiðarnar í smá olíu á teflonhúðaðri pönnu, þannig að hver sneið brúnist aðeins og setjið í skál. Steikið laukinn og hvítlaukinn saman í smá olíu án þess að brúna og setjið saman við kartöflurnar, kryddið með salti og pipar. Setjið í eldfast mót og hellið soðinu og rjómanum yfir. Bakið í ofni í 40 mín á 180 c. eða þar til kartöflurnar eru gegneldaðar.

Fiskur
Veltið fiskbitunum upp úr hveiti og steikið gullinbrúnan í olíu og smjöri. Skerið tómatana í sneiðar og leggið ofan á kartöfluformið og fiskbitana þar á. Setjið aftur í ofninn og bakið í nokkrar mínútur í viðbót eða þar til fiskurinn er tilbúinn.

Framreiðsla
Berið fram með salati og hvítlauksbrauði.

Athugasemdir

[Benedikt Halldórsson, 13.11.2008 kl. 16:58]

Þetta er gott.

Sjálfur hef ég verið að gera tilraunir með hjörtu, nei ekki ástina, bara kindahjörtu.

Ég set pott á heita hellu, sker alla fitu af hjartanu og sker það í næfurþunnar sneiðar. Þegar potturinn er sjóðheitur steiki ég hjörtun og krydda með kjúklingakryddi, eftir um 2 mínútur set ég frosið grænmeti samanvið. Ég bæti síðan rauðvínsediki og eina teskeið af sykri út í.

Fjögur hjörtu kosta um 160 krónur en ég geri ráð fyrir einu hjarta á mann.

Semsagt, góður matur sem kostar um 300 krónur sem gera innan við 100 krónur á mann.

[Sigrún (IP-tala skráð) 13.11.2008 kl. 20:27]

Þetta ætla ég örugglega að prófa!