Bakaður svínaskanki með kryddjurtum

 

 

 

 

 

 

1 skammtur
1 svínaskanki á mann
2-3 rósmaríngreinar
nokkur salvíulauf
jómfrúrólífuolía
1 hvítlauksgeiri
2 lárviðarlauf
2-3 einiber, marin
lítið glas af þurru hvítvíni
salt og pipar
2 stórar kartöflur skornar eftir endilöngu í báta

 

Skolið svínaskanka og þerrið og nuddið að utan með grófu salti og pipar. Leggið skankann í skál eða fat ásamt kryddjurtunum, hvítlauk, dreitil af jómfrúrólíufolíu og hvítvíni. Þekið skál með álpappír og látið kjötið marinerast í kæli yfir nótt. Takið skanka upp úr kryddlegið og brúnið á pönnu í jómfrúrólífuolíu í nokkrar mín. Snúið af og til, en notið ekki gaffal til að komast hjá því að kjötið tapi safa. Komið skanka svo fyrir í eldföstu móti ásamt kryddleginum úr skál og þekið með álpappír. Bakið við 200 gr. með álpappír yfir fyrsta klukkutímann til að varna því að kjötið þorni. Fjarlægið svo álpappír og bakið áfram í 30 mín. , snúið skanka 2-3 sinnum síðast hálftímann. Þegar 20 mín. eru eftir af eldunartíma bætið þá kartöflubátum í ofnskúffu. Sigtið kryddjurtirnar frá kjötsafanum og hellið kraftinum yfir kjötið og berið fram ásamt kartöflunum. Ef vill, má skvetta smá hvítvíni saman við kraftinn í fatinu og skerpa á augnablik á pönnu og láta vín gufa upp og sigta kryddjurtir svo frá.