Pönnusteikt sirloin með gljáandi rauðvínssósu

Undirbúningur og eldun: 20 mín Fyrir 4   4x220g sirloin steikur, vel verkaðar og fitusprengdar salt og pipar 5 skalotlaukar 50g sveppir 3 sneiðar beikon 3 dl kjötsoð, eða vatn og kjötkraftur ½ tsk timjan 2 dl bragðmikið rauðvín 1 lárviðarlauf 30g kalt smjör sósujafnari eða maisenamjöl úthrært í smá köldu vatni   Undirbúningur Skerið í gegn um fituröndina og sinina á steikunum á nokkrum stöðum til að koma í veg fyrir að steikin missi safa þegar steikin hitnar og sinin herpist saman. Skerið beikonið smátt og saxið sveppina og laukinn.   Matreiðsla Byrjið á að brúna steikurnar upp á rönd til að brúna fituna vel. Leggið þá steikurnar niður og brúnið vel á pönnunni, kryddið með salti og pipar, setjið á ofngrind.  Brúnið beikonið og grænmetið á pönnunni í fitunni sem varð eftir þegar kjötið var steikt. Bætið smá olíu á ef þörf krefur. Bætið soðinu og rauðvíninu á pönnuna ásamt timjan og lárviðarlaufinu, sjóðið niður um helming. Þykkið með sósujafnaranum, takið af hitanum og pískið köldu smjörinu í bitum út í sósuna. Athugið að sósan má ekki sjóða eftir að smjörið er komið í. Setjið steikurnar í 180 c heitan ofn í u.þ.b. 3 mínútur til að klára steikinguna.   Framreiðsla Berið steikurnar fram með rauðvínssósunni, litríku smjörsteiktu grænmeti og soðnum eða bökuðum kartöflum.

Athugasemdir

[Hallgerður Pétursdóttir (IP-tala skráð) 21.11.2008 kl. 08:37]

Guðjón minn vandi er að ég hef ekki komist upp á lag með að elda nautakjöt. Hef auðvitað í framhaldinu "sagt mér" að það sé vont..

[Guðrún Þóra Hjaltadóttir, 22.11.2008 kl. 23:26]

Takkk fyrir þetta. Ég er sammála Hallgerði ég elda aldrei nautakjöt nema hakkað. Hef slæma reynslu. Notaði það samt töluvert þegar ég dvaldi erlendis.

[Guðjón H Finnbogason, 23.11.2008 kl. 16:36]

Sælar. Ef þið eruð með 250gr nautasteik t.d.lund þá steikið hana á pönnu og lokið henni vel látið hana síðan bara bíða og steikið hana svo í 7-9 mín í ofni á 180° eftir hversu mikið steikt hún á að vera.Þegar ég nota nautalund þá læt ég hana þiðna í kæliskáp í viku,lambalæri í svipaðan tíma eða 10 daga.

[Guðrún Þóra Hjaltadóttir, 23.11.2008 kl. 16:52]

Naut er ekki bara naut, það hlýtur að fara eftir hvaðan þú hefur fengið það, hversu lengi það var látið hanga og trúlega eitthvað fleirra.

[Lilja Guðrún Þorvaldsdóttir, 23.11.2008 kl. 19:06]

Takk fyrir þetta.

[Guðjón H Finnbogason, 23.11.2008 kl. 19:22]

Ég nota hellst lundir af nautum frá Úrúgvæ.Lundir eru mýkstar og ekki lengi að meyrna.